Dette hugsar eg vi sa til kvarandre som born. Første og andre gongen var prøving og feiling, men tredje gongen måtte du ta det fulle ansvaret for det du gjorde.

Så også for Agrovisjon 2010. Arrangementet er den tredje i sitt slag i Stavanger Forum. Og vi har lært av det vi har gjort før. Årets Agrovisjon er derfor fornya i form og innhald. For oss som har med arrangementet å gjera er det nærast som ein eksamen. Vi vonar derfor at alle som lever av landbruk og mat legg turen innom Stavanger Forum i perioden 22-24 oktober og er med på å gi karakter til vårt arbeid.

Hovudkomiteen har gitt Agrovisjon 2010 tre stikkord:

• Informasjon
• Inspirasjon
• Møte med gode venner

Målet for oss er at Agrovisjon 2010 skal gi informasjon slik at ein tryggare kan gjera val for framtida. Vi har derfor lagt oss i selen og fått dei innleiarane som vi meiner har mest å gi. Og det er med glede og stoltheit eg som leiar av hovudkomiteen kan konstatere at vi har lukkast 100%.

Landbruk og produksjon av kvalitetsmat er viktig for Noreg, for Rogaland, for kommunen og for heimbygda. Her i Rogaland har vi definert oss sjølv som matfylket i Noreg. I fylket vårt har vi mange bønder og stor produksjon. Vi trur den flotte utstillinga som vi kan vise fram på Agrovisjon 2010 vil gi aktive bønder inspirasjon til å ta nye og framtidsretta tak. Kvifor reise til Agroteknikk eller til Agromek når vi har alt vi treng i distriktet like rundt stovedøra?

At alle som kjem på Agrovisjon 2010 vil treffe kjentfolk og gamle venner kan vi garantere. Målsettinga vår er at vi vil ha 10 000 gjester i utstillingshallane. Når folk møtes er det alltid muligheiter. Gamle vennskap kan friskast opp og fornyast og nye kan bli etablert.

Agrovisjon 2010 legg derfor til rette for at folk kan stoppe igjen i Stavanger Forum etter at utstillinga er slutt fredag. Då blir det lagt til rette for ein intim bondepub med irsk musikk. Og laurdag inviterer vi til ein staseleg festmiddag som blir avslutta med dans. Sjur Håland har lova å vera toastmaster. Alle dagar vil det bli sett opp gratis buss til og frå jernbanestasjonen i Stavanger.

Nytt av året er at vi inviterer familiar frå bygd og by til Agrovisjon 2010 søndag den 24. oktober. Mange vil nok, etter ein tur gjennom utstillingshallane, oppdage at landbruket er meir moderne og meir i tida enn dei har vore klar over.

Velkommen til Agrovisjon 2010
 

Sola 14 februar 2010

- Joar Oltedal
Leiar av hovudkomiteen

Sola 28. januar 2010

- Joar Oltedal